Mir Wiehlmys findes glatt – mir hälfe jetzt der Stadt

  
  Hesch du e Huus in Basel-Stadt
denn isch das hitte nimme glatt
hesch du gschpaart-dy Lääbe lang
und glyychwohl wirds dir Angscht und bang		  
 
denn s Diefbauamt duet informiere
ich miessy jetzte au saniere
es isch e ganz e beesi Gschicht
my Ablaufrohr syg nimme dicht		  
 
wenn d uff em WC hogge duesch
isch s klar dass denne spiele muesch
e Drugg uff s Gnepfli, zwai Sekunde
scho isch die ganzi Sach verschwunde		  
 
au s Wasser, das vom Tällerwäsche
der Räschte ussere Plastiggfläsche
Zahnbaschta, e Schlüggli suure Wyy
in Ablauf leert me alles dryy		  
 
au d Wöschmaschine schliesst me aa
und s Ussgussbeggi nääbedraa
e Ablaufrohr isch elegant
s verschwindet aifach in der Wand		  
 
doch jetze zrugg zer beese Gschicht
my Ablaufrohr syg nimme dicht		  
 
das bringt my fellig duurenand
denn vo der Stroos aa bis zur Källerwand
isch das kaibe Ablaufrohr
vergraabe, das sit fuffzig Joor
das haisst-me kunnt dert nimm derzue
und fertig ischs mit mynere Rueh		  
 
doch s Diefbauamt, das isch genial
hett e Leesig, die isch optimal
ans Rohr vo usse, kunnt me nimm
das syygy iberhaupt nid schlimm
Inlain- haisst das Zauberwort
und s funktioniert an jedem Ort		  
 
zem Schaffe bruuchts e grosse Schacht
de wird denn uff mym Grundstigg gmacht
die Leesig die isch grandios
es brucht nid ai Loch uff der Stroos		  
 
s Diefbauamt das duet diggtiere
und ich muess s Ganze finanziere
y find die Leesig schampar glatt
y zahl – und hälf dermit der Stadt.